45. plattdütsche Stammdisch bi „Bürgers für Schwaan“
An 22. Oktober (Wienmaand or Gilbhard) pünktlich Klock half söben (18.30 Uhr), dor hemm wi wedder sedden, an unsen plattdütschen Stammdisch, in uns Begegnungsstätt bi Bürgers för Schwaan, in de Möhlenstraat.
Uns Marianne hett lecker Smolt mitbröcht und Ilona hett Swattbrot köfft, un los güng dat mit Smoltstullen smeeren. Lang blewen se nich up de Tellers liggen, denn se wieren fix all.
Vörnwech kemmen wi denn, wie jedet mol, to uns Thema: Wat giwt dat Nieges in Schwaan?
- To iehrst hemm wi all de Bustell von de olle „Börse“ bewundert…süht ja ok super ut de Fassade, dat Dack mit de Finsters in`t Dachgeschoß, mit dat Holt und dat Muerwerk an de Siet und von hinne up de Balkone. Unne sall ja nu Hörakustik rin -hemm de annern secht….
- Thema 2 – de Bu an de Warnowbrück, Krasemannsche Hoff - Kein ein weit hier so richtig, ward dat wat oder ob dat wat ward, na töwen wi mol af, de Lüd passen schon up.
- De niege Bäcker an Markt hett ja nu Urlaub, möt ok mal sein, Hauptsach he moggt ok wedder up – sünst möt uns Alfred nebenan noch Kaffee un Kauken verköpen, wenn`t mit de Schauh nich löpt.
- De Bumarkt an de Niendörper Chausse is tau – so`n Schiet ok. Nu mödden de Schwaaners nach Bützow, Güstrow or Rostock, wenn`se wat bruken, för ehr Hüsers.
Nu kemen wi to uns Thema von`n Abend – Uns Einschulung. Ja, dor wieren de Frugens und vörnweg uns Ilona as oll Schaulliehrerin (ohn` Genderteiken!!!!) in ehren Element.
Wat harren se allens mitbröcht, nich nur Bilders, nee, ganze Fotoalben mit Bilders von Foto Bode, wo se as Kind up wieren mit Schaultüt. Und de wier vull mit Süssigkeiten und wat för de Schaul. Un denn de ollen Klassenfotos – wegge wier dat un wat is dat för een?
Achter de Fieerstunn güng dat ierstmol in Klassenraum in de Ossenschaul. Dor wieren dunnemal noch richtige Holzbänke, Klapptafel un to`n recken liernen – een Abakus. De wier so grot as ne Tafel und harr Reihen mit Kogels up`n Draht, de künn man von links nah rechts schuben und so hemm wi recken liernt. Später kem denn de Reckenschieber, awer dat wier wat anners. Und Liehrers harren wi, kluge, stolte un achtbare Persönlichkeiten…Ganz wi bi Heinz Rühmann in de „Feuerzangenbowle“ or bi de „Heiden von Kummerow or ji kiekt mal in`t Landschulmuseum in Göldenitz bi Dummersdörp in.
Ja, uns olle Schaulliehrers. Se wieren so as wi, so as wie alle Schwaaners, se wieren wat ganz besonders – unvergetten!
Dat next mal is uns Stammdisch wedder in November (Nebelung).
Dat steriht in de „Mein Ort“ App und in unse Whats App Grupp und in Kieckkasten bi „Bürgers für Schwaan“.
Up jeden Fall moggen wi noch `ne lütt Wiehnachtsfier in dit Johr.
Ji künnt uns ok anropen.
Bit dorhen
Quelle: Schwaaner Amtsreport
Von Lydia Heinze